ଭାରତ ନିର୍ବାଚନ କମିଶନ ଦ୍ଵାରା ସମ୍ବର୍ଦ୍ଧିତ ହେବେ ନୂଆପଡା, ଜିଲ୍ଲାପାଳ:ଉତ୍ତମ ନିର୍ବାଚନ ପରିଚାଳନା ଓ ଲଜିଷ୍ଟିକ୍ସ ପାଇଁ ଏହି ପୁରସ୍କାର ପ୍ରଦାନ କରାଯିବ

ନୂଆପଡା : ଭାରତ ନିର୍ବାଚନ କମିଶନ ଦ୍ଵାରା ମୁଖ୍ୟ ନିର୍ବାଚନ ଅଧିକାରୀ, ଓଡ଼ିଶାଙ୍କୁ ପତ୍ର ମଧ୍ୟ ମାଧ୍ୟମରେ ଜଣାଇ ଦିଆଯାଇଛି ଯେ, ନୂଆପଡା, ଜିଲ୍ଲାପାଳ ମଧୁସୂଦନ ଦାଶଙ୍କୁ ଉତ୍ତମ ନିର୍ବାଚନ ପରିଚାଳନା ଓ ଲଜିଷ୍ଟିକ୍ସ ପାଇଁ ଜାତୀୟ ଭୋଟର ଦିବସ ଅବସରରେ ଜାତୀୟ ସ୍ତରରେ ସମ୍ୱର୍ଦ୍ଧିତ କରାଯିବ l ଏହି ପୁରସ୍କାର ୨୫ ଜାନୁଆରୀ, ୨୦୨୬ରେ ଦିଲ୍ଲୀ କ୍ୟାଣ୍ଟନମେଣ୍ଟ, ନୂଆଦିଲ୍ଲୀରେ ମାନେକ୍ସା ସେଣ୍ଟରରେ ପାଳନ ହେବାକୁ ଥିବା ଜାତୀୟ ଭୋଟର ଦିବସ ଦିନ ପ୍ରଦାନ କରାଯିବ। ଶ୍ରେଷ୍ଠ ନିର୍ବାଚନ ଜିଲ୍ଲା ବର୍ଗ ରେ ଏହି ପୁରସ୍କାର ପ୍ରଦାନ କରାଯାଉଛି l ସୂଚନାଯୋଗ୍ୟ ଯେ ନିକଟ ଅତୀତରେ ଜିଲ୍ଲା ପ୍ରଶାସନ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀଙ୍କ ବଳିଷ୍ଠ ଦିଗ ଦର୍ଶନରେ ଅତ୍ୟନ୍ତ ସଫଳତାର ସହିତ ମୁକ୍ତ, ଅବାଧ ଏବଂ ନିରପେକ୍ଷ ଭାବରେ ନୂଆପଡା ବିଧାନସଭା ଉପନିର୍ବାଚନ ସମ୍ପନ୍ନ କରିଛନ୍ତି l ଏହି ଉପ-ନିର୍ବାଚନ ରେ ଅନେକ ଉତ୍ତମ ପଦକ୍ଷେପ ଗ୍ରହଣ କରାଯାଇଥିଲା l ଦୁର୍ଗମ ମାଓବାଦୀ ଅଧ୍ୟୁଷିତ ଅଞ୍ଚଳରେ ଲଜିଷ୍ଟିକ୍ ଚ୍ୟାଲେଞ୍ଜକୁ ଦୂର କରିବା ପାଇଁ ହେଲିକପ୍ଟରକୁ ଅଭିନବ ଭାବରେ ବ୍ୟବହାର କରାଯାଇଥିଲା। ପ୍ରମୁଖ ଉଦ୍ଭାବନ ମଧ୍ୟରେ ଜି ଆଈ ଏସ୍ ଆଧାରିତ ସର୍ଟି ଯୋଜନା ଥିଲା। ସମନ୍ୱିତ ଏୟାର-ଗ୍ରାଉଣ୍ଡ ସମନ୍ୱୟ ଏବଂ ଏୟାର ଏବଂ ଗ୍ରାଉଣ୍ଡ ରୁଟ୍ ମିଶ୍ରଣ କରି ଏକ ହାଇବ୍ରିଡ୍ ପରିବହନ ମଡେଲ୍ ଅନ୍ତର୍ଭୁକ୍ତ ଥିଲା। ପ୍ରତିକୂଳ ପାଗରେ ମଧ୍ୟ ନିର୍ବାଚନ କାର୍ଯ୍ୟକୁ ଆଗେଇ ନେବା ପାଇଁ ସୁନାବେଡାରେ ଏକ ସ୍ଥାୟୀ ହେଲିପ୍ୟାଡ୍ ନିର୍ମାଣ କରାଯାଇଥିଲା। ଫଳରେ "କୋଣସି ଭୋଟର ଭୋଟ ଦାନ ରୁ ବଞ୍ଚିତ ହେବେ ନାହିଁ" ନୀତିକୁ ବଜାୟ ରଖି ଶତ ପ୍ରତିଶତ ପୋଲିଂ ଟିମ୍ ନିୟୋଜିତ କରିବା, ଶୂନ୍ୟ ପରିବହନ ଅଘଟଣ ଏବଂ ଭୋଟରଙ୍କ ଯୋଗଦାନ ବୃଦ୍ଧି କରାଯାଇଥିଲା। ଏହି ପଦକ୍ଷେପଗୁଡ଼ିକ ସୁରକ୍ଷିତ, ଦକ୍ଷ ଏବଂ ଅନ୍ତର୍ଭୁକ୍ତ ନିର୍ବାଚନ ପରିଚାଳନାକୁ ସୁନିଶ୍ଚିତ କରିଥିଲା, ଯାହା ଦୁର୍ଗମ କଷ୍ଟକର ଅଞ୍ଚଳରେ ଭବିଷ୍ୟତ ନିର୍ବାଚନ ପାଇଁ ସମଗ୍ର ଦେଶରେ ଏକ ମାନଦଣ୍ଡ ସ୍ଥାପନ କରିଥିଲା। ଆହୁରି ମଧ୍ୟ ଏହି ନିର୍ବାଚନରେ ସୂଚନା ଓ ପ୍ରଯୁକ୍ତି ବିଦ୍ୟାର ସଫଳ ଉପଯୋଗ କରାଯାଇଥିଲା lଏଥିପାଇଁ ନୂଆପଡା ଉପନିର୍ବାଚନରେ ୮୩.୪୫ ପ୍ରତିଶତ ମତଦାନ ହୋଇ ସମଗ୍ର ଦେଶରେ ଏହିଦିନ ହୋଇଥିବା ସମସ୍ତ ନିର୍ବାଚନରେ ପୋଲିଂରେ ପ୍ରଥମ ସ୍ଥାନ ଅଧିକାର କରିଥିଲା l

 ନୂଆପଡ଼ାରୁ ବିଶ୍ୱନାଥ ସାମଲଙ୍କ ରିପୋର୍ଟ ଫାଷ୍ଟ ନିୟୁଜ ଓଡିଶା