ଜଳେଶପଟାରେ ସ୍ୱାମୀ ଲକ୍ଷ୍ମଣାନନ୍ଦଙ୍କ ୧୮ତମ ଶ୍ରାଦ୍ଧବାର୍ଷିକୀ

ଜଳେଶପଟାରେ ସ୍ୱାମୀ ଲକ୍ଷ୍ମଣାନନ୍ଦଙ୍କ ୧୮ତମ ଶ୍ରାଦ୍ଧବାର୍ଷିକୀ ନିରାଡମ୍ବର ଭାବେ ପାଳିତ ହେଲା ବଳିଦାନ ଦିବସ; ଶତାଧିକ ଅନୁଗାମୀଙ୍କ ଶ୍ରଦ୍ଧାଞ୍ଜଳି ତୁମୁଡ଼ିବନ୍ଧ: କନ୍ଧମାଳ ଜିଲ୍ଲାର ଜଳେଶପଟା ସଂସ୍କୃତ କନ୍ୟାଶ୍ରମରେ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ୧୮ତମ ଶ୍ରାଦ୍ଧବାର୍ଷିକୀ ନିରାଡମ୍ବର ଭାବେ ପାଳିତ ହୋଇଛି। ବିଶ୍ୱ ହିନ୍ଦୁ ପରିଷଦ ପକ୍ଷରୁ ଦିନଟିକୁ ବଳିଦାନ ଦିବସ ଭାବେ ପାଳନ କରାଯାଇଛି। ଏହି ଅବସରରେ ଆଶ୍ରମ ପରିସରରେ ବିଭିନ୍ନ ଧାର୍ମିକ କାର୍ଯ୍ୟକ୍ରମ ସହ ଶ୍ରଦ୍ଧାଞ୍ଜଳି ସଭା ଆୟୋଜିତ ହୋଇଥିଲା। ତିଥି ଅନୁସାରେ ଆଜିର ଦିନରେ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ସମେତ ପାଞ୍ଚ ଜଣଙ୍କୁ ଗୁଳି କରି ହତ୍ୟା କରାଯାଇଥିଲା। ଘଟଣାର ସ୍ମୃତିରେ ପ୍ରତିବର୍ଷ ଜଳେଶପଟା କନ୍ୟାଶ୍ରମରେ ଶ୍ରାଦ୍ଧବାର୍ଷିକୀ ପାଳନ କରାଯାଉଛି। କଳସ ଯାତ୍ରାରୁ ଆରମ୍ଭ ସକାଳୁ ଆଶ୍ରମର ଅନ୍ତେବାସିନୀମାନେ ଜଳେଶପଟା ନଦୀରୁ କଳସରେ ଜଳ ଆଣି କଳସ ଯାତ୍ରା କରିଥିଲେ। ପରେ ଗୋପୂଜନ, ନାମଯଜ୍ଞ, ଯଜ୍ଞ ପୂର୍ଣ୍ଣାହୁତି ଓ ପ୍ରସାଦ ସେବନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଆଶ୍ରମ ପରିସରରେ ବିଭିନ୍ନ କୀର୍ତ୍ତନ ମଣ୍ଡଳୀ ରାମନାମ ଜପ କରିଥିଲେ। ପ୍ରତିମୂର୍ତ୍ତିରେ ମାଲ୍ୟାର୍ପଣ ସ୍ୱାମୀଜୀଙ୍କ ପ୍ରତିମୂର୍ତ୍ତିରେ ଶତାଧିକ ଅନୁଗାମୀ ଓ ଶ୍ରଦ୍ଧାଳୁ ପୁଷ୍ପମାଲ୍ୟ ଅର୍ପଣ କରି ଶ୍ରଦ୍ଧାଞ୍ଜଳି ଜଣାଇଥିଲେ। ଶ୍ରଦ୍ଧାଞ୍ଜଳି ସଭାରେ ସ୍ୱାମୀଜୀଙ୍କ ଜୀବନ ଓ କନ୍ଧମାଳ ପାଇଁ ତାଙ୍କ ଅବଦାନକୁ ସ୍ମରଣ କରାଯାଇଥିଲା। କୃଷି, ଗୋସେବା ଓ ସମାଜସେବା କ୍ଷେତ୍ରରେ ତାଙ୍କ କାର୍ଯ୍ୟକୁ ଅନୁଗାମୀମାନେ ମନେ ପକାଇଥିଲେ। ଯୋଗଦେଲେ ବହୁ ବିଶିଷ୍ଟ ବ୍ୟକ୍ତି କାର୍ଯ୍ୟକ୍ରମରେ ଜଳେଶପଟାର ମୁଖ୍ୟ ସ୍ୱାମୀ ଜୀବନମୁକ୍ତାନନ୍ଦ ପୁରୀ, ସୁଦୟା ବାବା, ସାନ୍ଧ୍ୟରାଣୀ ପାଣିଗ୍ରାହୀ, ହୀରାଲାଲ ପ୍ରଧାନ, ପଣ୍ଡିତ ମହେଶ କୁମାର ସାହୁ, ସାଧୁ ପ୍ରଭାକର ଦାଶ, ବିଜେପି ଜିଲ୍ଲା ସଭାପତି ପଣ୍ଡିତ ବିଶିମାଝି ଓ ଅବସରପ୍ରାପ୍ତ ମୁଖ୍ୟ ଅଧୀକ୍ଷଣ ଯନ୍ତ୍ରୀ ସୂର୍ଯ୍ୟନାରାୟଣ ପାଣିଗ୍ରାହୀଙ୍କ ସମେତ ବହୁ ଶ୍ରଦ୍ଧାଳୁ ଉପସ୍ଥିତ ଥିଲେ। କ୍ଷେତ୍ରୀୟ ସମ୍ପାଦକ ପ୍ରିୟରଞ୍ଜନ ଚୌଧୁରୀ ସଭା ସଂଚାଳନ କରିଥିଲେ। ସୁରକ୍ଷା ବ୍ୟବସ୍ଥା କଡ଼ାକଡ଼ି ବଳିଦାନ ଦିବସକୁ ଦୃଷ୍ଟିରେ ରଖି କନ୍ଧମାଳରେ ଆଇନଶୃଙ୍ଖଳା ବ୍ୟବସ୍ଥା କଡ଼ାକଡ଼ି କରାଯାଇଥିଲା। ସମଗ୍ର ଜିଲ୍ଲାରେ ୯ ପ୍ଲାଟୁନ୍‌ ପୋଲିସ ଫୋର୍ସ ମୁତୟନ ହୋଇଥିବାବେଳେ ୨ ଜଣ ଅତିରିକ୍ତ ଏସ୍‌ପି, ୩ ଜଣ ଡିଏସ୍‌ପି ଓ ଜଣେ ଏସ୍‌ପିଙ୍କ ନେତୃତ୍ୱରେ ପୋଲିସ ଅଧିକାରୀମାନେ ନିୟୋଜିତ ରହିଥିଲେ।