।। ଲାଞ୍ଚ ନେବାବେଳେ ଭିଜିଲାନ୍ସ ପଞ୍ଝାରେ ମୁରିବାହାଲ ତହସିଲ୍‌ କାର୍ଯ୍ୟାଳୟର ବରିଷ୍ଠ ରାଜସ୍ୱ ସହାୟକ ।।

ଲାଞ୍ଚ ନେବାବେଳେ ଭିଜିଲାନ୍ସ ହାତରେ ଧରାପଡ଼ିଲେ ବଲାଙ୍ଗିର ଜିଲ୍ଲା ମୁରିବାହାଲ ତହସିଲ କାର୍ଯ୍ୟାଳୟର ବରିଷ୍ଠ ରାଜସ୍ୱ ସହାୟକ ତଥା ରେକର୍ଡ କିପର୍‌ ହେମଲେଟ୍‌ ବାର୍‌ଲା । ସୂଚନା ଅନୁସାରେ ୨୦୧୯ରେ ମ୍ୟୁଟେସନ୍‌ କେସ୍‌ ପଂଜିକୃତ ହୋଇଥିବା ବେଳେ ଅଭିଯୋଗକାରୀ ଜମି ପଟ୍ଟା ପାଇଁ ଶ୍ରୀ ବାର୍ଲାଙ୍କ ପାଖକୁ ବାରମ୍ବାର ଧାଇଁ ଧାଇଁ ନୟାନ୍ତ ହୋଇଥିଲେ l କିନ୍ତୁ ଶ୍ରୀ ବାର୍ଲା ଏଥିପାଇଁ ୨୦ ହଜାର ଟଙ୍କା ଲାଂଚ ମାଗିଥିଲେ । ଏହାପରେ ଅଭିଯୋଗକାରୀ ଜିଲ୍ଲା ଦୁର୍ନୀତି ନିବାରଣ ବିଭାଗର ଦ୍ୱାରସ୍ଥ ହୋଇଥିଲେ । ଶ୍ରୀ ବାର୍ଲାଙ୍କୁ ଲାଂଚ ନେବା ବେଳେ କାବୁ କରିବା ପାଇଁ ଜାଲ ବିଛାଇଥିଲା ଭିଜିଲାନ୍ସ ବିଭାଗ । ଆଜି ପ୍ରଥମ ପର୍ଯ୍ୟାୟରେ ଏହି ବାବଦକୁ ମୁରିବାହାଲ ତହସିଲ କାର୍ଯ୍ୟାଳୟରେ ବରିଷ୍ଠ ରାଜସ୍ୱ ସହାୟକ ଶ୍ରୀ ବାର୍ଲା ୧୦ ହଜାର ଟଙ୍କା ଲାଂଚ ନେଉଥିବା ବେଳେ ମାଡ଼ି ବସିଥିଲା ଭିଜିଲାନ୍ସ । ଶ୍ରୀ ବାର୍ଲାଙ୍କ ଠାରୁ ଲାଂଚ ଟଙ୍କା ଉଦ୍ଧାର ହୋଇଥିବା ବେଳେ ତାଙ୍କୁ ଗିରଫ୍‌ କରାଯାଇ ବଲାଙ୍ଗିର ଜିଲ୍ଲା ଦୁର୍ନୀତି ନିବାରଣ କାର୍ଯ୍ୟାଳୟକୁ ଅଣାଯାଇଥିବା ସୂଚନା ମିଳିଛି । ଏଥିସହିତ ଶ୍ରୀ ବାର୍ଲାଙ୍କ ସଂଶ୍ଲିଷ୍ଟତା ଥିବା ଦୁଇଟି ସ୍ଥାନରେ ଭିଜିଲାନ୍ସ ଚଢ଼ାଉ ଚାଲିଥିବା ଜଣାପଡ଼ିଛି । ଅନ୍ୟପକ୍ଷରେ ଶ୍ରୀ ବାର୍ଲାଙ୍କୁ ଦ୍ୱିତୀୟ ଥର ପାଇଁ ଲାଂଚ ନେବା ବେଳେ ଭିଜିଲାନ୍ସ ଟ୍ରାପ୍‌ ହୋଇଥିବା ଶୁଣିବାକୁ ମିଳୁଛି।

 ବଲାଙ୍ଗୀର ରୁ ବାଳକୃଷ୍ଣ ମିଶ୍ର ଙ୍କ ସହିତ ସତ୍ୟଜିତ ଷଡ଼ଙ୍ଗୀ ଙ୍କ ରିପୋର୍ଟ କୋରାପୁଟ ପ୍ରଥମ ଖବର