ପ୍ରଧାନମନ୍ତ୍ରୀ କିଷାନ ଯୋଜନାର ୨୪ତମ କିସ୍ତି ଅନୁଦାନ ପ୍ରଦାନ: ମାଲକାନଗିରି ଜିଲ୍ଲା କଲେକ୍ଟୋରେଟ୍‌ଠାରେ ପି.ଏମ୍-କିଷାନ ଉତ୍ସବ ଦିବସ ପାଳିତ, ୫୨,୫୫୮ ଚାଷୀ ଉପକୃତ

*ମାଲକାନଗିରି, ୩୦ ଅକ୍ଟୋବର ୨୦୨୬:* ମାଲକାନଗିରି ଜିଲ୍ଲା ପ୍ରଶାସନ ଏବଂ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ଆଜି ସ୍ଥାନୀୟ ଜିଲ୍ଲାପାଳ କାର୍ଯ୍ୟଳୟ ପରିସରସ୍ଥିତ ଏଫ୍.ଏଲ୍.ସି ହଲ୍‌ଠାରେ ଜିଲ୍ଲା ସ୍ତରୀୟ ପି.ଏମ୍-କିଷାନ ଉତ୍ସବ ଦିବସ ଅତ୍ୟନ୍ତ ଉତ୍ସାହର ସହ ପାଳିତ ହୋଇଯାଇଛି। ଏହି ଅବସରରେ ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁଜରାଟର ବନସକାଣ୍ଠାରୁ ପ୍ରତ୍ୟକ୍ଷ ଲାଭ ହସ୍ତାନ୍ତରଣ ବ୍ୟବସ୍ଥା ମାଧ୍ୟମରେ ଦେଶର ଯୋଗ୍ୟ ଚାଷୀମାନଙ୍କ ପାଇଁ ପି.ଏମ୍-କିଷାନ ଯୋଜନାର ୨୪ତମ କିସ୍ତିର ସହାୟତା ରାଶି ପ୍ରଦାନ କରିଛନ୍ତି, ଯାହାର ସିଧାପ୍ରସାରଣ ଏହି କାର୍ଯ୍ୟକ୍ରମରେ ପ୍ରଦର୍ଶିତ କରାଯାଇଥିଲା। ଏହି ନୂତନ କิସ୍ତି ମାଧ୍ୟମରେ ମାଲକାନଗିରି ଜିଲ୍ଲାର ମୋଟ ୫୨,୫୫୮ ଜଣ ହିତାଧିକାରୀ ଚାଷୀ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ସିଧାସଳଖ ଆର୍ଥିକ ସହାୟତା ପାଇ ଉପକୃତ ହୋଇଛନ୍ତି। ଏହି ଉତ୍ସବରେ ମାଲକାନଗିରି ବିଧାୟକ ନରସିଂହ ମାଡ଼କାମୀ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ସ୍ଵତନ୍ତ୍ର ବିକାଶ ପରିଷଦ ଅଧ୍ୟକ୍ଷ ଗଙ୍ଗାଧର ସୋଡ଼ି, ଚିତ୍ରକୋଣ୍ଡା ବିଧାୟକଙ୍କ ପ୍ରତିନିଧି ଗୋବିନ୍ଦ ପାତ୍ର, ଅତିରିକ୍ତ ଜିଲ୍ଲାପାଳ ରାଜସ୍ୱ ବେଦବର ପ୍ରଧାନ ଏବଂ ମୁଖ୍ୟ ଜିଲ୍ଲା କୃଷି ଅଧିକାରୀ ଅନିଲ ପ୍ରହରାଜ ପ୍ରମୁଖ ଉପସ୍ଥିତ ରହି ଚାଷୀମାନଙ୍କୁ ଉଦ୍‌ବୋଧନ ଦେଇଥିଲେ। କାର୍ଯ୍ୟକ୍ରମରେ ମୁଖ୍ୟ ଅତିଥି ବିଧାୟକ ଶ୍ରୀ ମାଡ଼କାମୀ ନିଜ ବକ୍ତବ୍ୟରେ କହିଛନ୍ତି ଯେ, କୃଷକମାନେ ହେଉଛନ୍ତି ଆମ ଅର୍ଥନୀତିର ମେରୁଦଣ୍ଡ। ପି.ଏମ୍-କିଷାନ ଏବଂ ସି.ଏମ୍-କିଷାନ ଭଳି କଲ୍ୟାଣକାରୀ ଯୋଜନା ଚାଷୀ ଭାଇମାନଙ୍କୁ ଆର୍ଥିକ ସ୍ୱାବଲମ୍ବୀ କରିବା ସହ ସେମାନଙ୍କ ଉତ୍ପାଦନ କ୍ଷମତା ବୃଦ୍ଧି କରିବାରେ ବେଶ୍ ସହାୟକ ହେଉଛି। ଜିଲ୍ଲାର ପ୍ରତିଟି ଯୋଗ୍ୟ ଚାଷୀଙ୍କ ପାଖରେ ସରକାରୀ ସହାୟତା ପହଞ୍ଚାଇବା ପାଇଁ ପ୍ରଶାସନ ସଦାସର୍ବଦା ପ୍ରତିଶ୍ରୁତିବଦ୍ଧ। ଅତିଥିମାନେ ଜିଲ୍ଲାର କୃଷି ଉନ୍ନୟନ ଏବଂ ଚାଷୀମାନଙ୍କର ଆର୍ଥିକ ଅଭିବୃଦ୍ଧି ପାଇଁ କାର୍ଯ୍ୟକାରୀ ହେଉଥିବା ବିଭିନ୍ନ ସରକାରୀ ଯୋଜନାର ସଫଳତା ସମ୍ପର୍କରେ ସୂଚନା ପ୍ରଦାନ କରିଥିଲେ। ସୂଚନାଯୋଗ୍ୟ ଯେ, ପୂର୍ବରୁ ପ୍ରଧାନମନ୍ତ୍ରୀ କୃଷକ ସମ୍ମାନ ନିଧି ଯୋଜନାର ୨୨ତମ କିସ୍ତି ସୁଦ୍ଧା ଜିଲ୍ଲାର ୪୯,୯୭୯ ଜଣ ଚାଷୀ ଉପକୃତ ହୋଇଥିବା ବେଳେ ବର୍ତ୍ତମାନ ଏହି ସଂଖ୍ୟା ବୃଦ୍ଧି ପାଇ ୫୨,୫୫୮ରେ ପହଞ୍ଚିଛି। ଚାଷୀମାନଙ୍କ ରୋଜଗାର ବୃଦ୍ଧି ଓ ମୃତ୍ତିକା ସୁରକ୍ଷା ପାଇଁ ଜିଲ୍ଲାରେ ଚାଲିଥିବା ଅନ୍ୟାନ୍ୟ କୃଷି ଅଭିଯାନ ସମ୍ପର୍କରେ ମଧ୍ୟ କାର୍ଯ୍ୟକ୍ରମରେ ବିସ୍ତୃତ ଆଲୋଚନା କରାଯାଇଥିଲା। ଆଜିର ଏହି ଉତ୍ସବରେ ମାଲକାନଗିରି ଜିଲ୍ଲାର ପ୍ରାୟ ୧୦୦ରୁ ଅଧିକ ପ୍ରଗତିଶୀଳ ପି.ଏମ୍-କିଷାନ ହିତାଧିକାରୀ ଚାଷୀ ସିଧାସଳଖ ଉପସ୍ଥିତ ରହି ପ୍ରଧାନମନ୍ତ୍ରୀଙ୍କ ଅଭିଭାଷଣ ଶୁଣିଥିଲେ। କାର୍ଯ୍ୟକ୍ରମରେ ଜିଲ୍ଲା ସ୍ତରୀୟ ବରିଷ୍ଠ କୃଷି ଅଧିକାରୀ, ପ୍ରଶାସନିକ ପଦାଧିକାରୀ ଏବଂ ବିଭିନ୍ନ ପ୍ରିଣ୍ଟ୍ ଓ ଇଲେକ୍ଟ୍ରୋନିକ୍ ଗଣମାଧ୍ୟମର ପ୍ରତିନିଧିମାନେ ବହୁ ସଂଖ୍ୟାରେ ଯୋଗଦେଇ ଏହାର ବ୍ୟାପକ ପ୍ରଚାର ପ୍ରସାର କରିବା ସହ କାର୍ଯ୍ୟକ୍ରମକୁ ସମ୍ପୂର୍ଣ୍ଣ ସଫଳ କରାଇଛନ୍ତି।