ଝାରସୁଗୁଡ଼ା ଏକତାଲି ସରକାରୀ ଫାର୍ମରେ ମାଛ ଯାଆଁଳ ବିକ୍ରି ଆରମ୍ଭ:ରୋହି, ଭାକୁର ଓ ମିରକାଳି ଭଳି ଉନ୍ନତ କିସମର ଯାଆଁଳ ଉପଲବ୍ଧ"ସରକାରୀ ରିହାତି ଦରରେ ଏପର୍ଯ୍ୟନ୍ତ ବିକ୍ରି ହେଲାଣି ପ୍ରାୟ ୧୧ ଲକ୍ଷ ଯାଆଁଳ

*ଝାରସୁଗୁଡ଼ା, ୨୯/୦୯:(ଫାଷ୍ଟ ନ୍ୟୁଜ ଓଡ଼ିଶା)* ଏକତାଲି ସ୍ଥିତ ସରକାରୀ ମାଛ ଯାଆଁଳ ଉତ୍ପାଦନ କେନ୍ଦ୍ରରେ ଚଳିତ ବର୍ଷ ପାଇଁ ମାଛ ଯାଆଁଳ ବିକ୍ରି ପ୍ରକ୍ରିୟା ଜୋରଦାର ଚାଲିଛି। ଜିଲ୍ଲାର ମତ୍ସ୍ୟ ଚାଷୀମାନଙ୍କୁ ସୁଲଭ ମୂଲ୍ୟରେ ଉନ୍ନତମାନର ଯାଆଁଳ ଯୋଗାଇଦେବା ଲକ୍ଷ୍ୟରେ ବିଭାଗ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି। ଏହି କେନ୍ଦ୍ରରୁ ମୁଖ୍ୟତଃ ରୋହି, ଭାକୁର (କାତଲା) ଏବଂ ମିରକାଳି ଭଳି ଉଚ୍ଚ ମାନର ଯାଆଁଳ ଚାଷୀମାନଙ୍କୁ ଯୋଗାଇ ଦିଆଯାଉଛି। ବିଭିନ୍ନ ବ୍ଲକରୁ ପଞ୍ଜୀକୃତ ତଥା ସ୍ଥାନୀୟ ମତ୍ସ୍ୟ ଚାଷୀମାନେ ଫାର୍ମକୁ ଆସି ନିଜ ଆବଶ୍ୟକତା ଅନୁଯାୟୀ ଯାଆଁଳ ସଂଗ୍ରହ କରୁଥିବା ଦେଖିବାକୁ ମିଳିଛି। ଚଳିତ ୨୦୨୬-୨୭ ଆର୍ଥିକ ବର୍ଷରେ ଏକତାଲି ଫାର୍ମରେ ପ୍ରାୟ ୪୫ ଲକ୍ଷ ଗୁଣ୍ଡ ଯାଆଁଳ ଛଡ଼ା ଯାଇଥିଲା। ପର୍ଯ୍ୟାପ୍ତ ଯତ୍ନ ଓ ବୈଷୟିକ ପରିଚାଳନା ପରେ ଯାଆଁଳଗୁଡ଼ିକ ଉପଯୁକ୍ତ ଆକାର (୪୧ ରୁ ୬୦ ମିଲିମିଟର) ଧାରଣ କରିବା ପରେ ବିକ୍ରି କାର୍ଯ୍ୟ ଆରମ୍ଭ ହୋଇଛି। ସରକାରଙ୍କ ଦ୍ୱାରା ନିର୍ଦ୍ଧାରିତ ରିହାତି ଦର ଅନୁଯାୟୀ ପ୍ରତି ୧,୦୦୦ ଯାଆଁଳ ପିଛା ମାତ୍ର ୩୬୦ ଟଙ୍କା ଧାର୍ଯ୍ୟ କରାଯାଇଛି, ଯାହାକି ବଜାର ଦର ତୁଳନାରେ ଯଥେଷ୍ଟ କମ୍ ଏବଂ ଚାଷୀଙ୍କ ପାଇଁ ଲାଭଜନକ। ଜିଲ୍ଲା ମତ୍ସ୍ୟ ଅଧିକାରୀ ଶ୍ରୀ ମହମ୍ମଦ ଫିରୋଜଙ୍କ ସୂଚନା ଅନୁଯାୟୀ, ଗତ ସେପ୍ଟେମ୍ବର ୨୮ ସୁଦ୍ଧା ଫାର୍ମରୁ ମୋଟ ୧୦ ଲକ୍ଷ ୮୯ ହଜାର (୧୦.୮୯ ଲକ୍ଷ) ଯାଆଁଳ ବିଭିନ୍ନ ଚାଷୀଙ୍କୁ ବିକ୍ରି କରାଯାଇ ସାରିଛି। ଉଚ୍ଚ ବଞ୍ଚିବା ହାର ତଥା ଉନ୍ନତ ବୃଦ୍ଧି କ୍ଷମତା ଥିବାରୁ ଏହି ଯାଆଁଳ ପ୍ରତି ଜିଲ୍ଲାର ଚାଷୀମାନେ ବିଶେଷ ଆଗ୍ରହ ପ୍ରକାଶ କରୁଛନ୍ତି। ଆଗାମୀ ଦିନରେ ଅଧିକରୁ ଅଧିକ ଚାଷୀ ଫାର୍ମରୁ ସିଧାସଳଖ ଯାଆଁଳ ସଂଗ୍ରହ କରି ସରକାରୀ ଯୋଜନାର ଲାଭ ଉଠାଇବାକୁ ବିଭାଗୀୟ ଅଧିକାରୀମାନେ ପରାମର୍ଶ ଦେଇଛନ୍ତି।

ଝାରସୁଗୁଡ଼ା ରୁ ସମୀର କୁମାର ପଟେଲଙ୍କ ରିପୋର୍ଟ ଫାଷ୍ଟ ନ୍ୟୁଜ ଓଡ଼ିଶା