ଘଟଯାତ୍ରାକୁ ନେଇ ଥୁଆମୂଳ ରାମପୁର ଅଞ୍ଚଳ ଚଳଚଞ୍ଚଳ

ଥୁଆମୂଳ ରାମପୁର ୨୯! ୩ କଳାହାଣ୍ଡି ଜିଲ୍ଲାର ଥୁଆମୂଳ ରାମପୁର ଅଞ୍ଚଳରେ ମାଁ ଠାକୁରାଣୀଙ୍କ ପବିତ୍ର ଘଟଯାତ୍ରା ପାଳନ ଅବସରରେ ସମଗ୍ର ଅଞ୍ଚଳ ଉତ୍ସବମୁଖର ହୋଇଉଠିଛି। ଗାଁ ଗାଁରେ ଧାର୍ମିକ ମାହୋଲ ସୃଷ୍ଟି ହୋଇଥିବା ବେଳେ ଭକ୍ତମାନଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳୁଛି। ଏହି ପର୍ବକୁ ନେଇ ଗ୍ରାମଗୁଡ଼ିକରେ ବିଭିନ୍ନ ପାରମ୍ପରିକ ଆଚାର-ବିଚାର ଓ ପୂଜାର୍ଚ୍ଚନା ଆୟୋଜିତ ହେଉଛି। ମାନସିକ ଧାରୀ ଭକ୍ତମାନେ ମାଁ ଠାକୁରାଣୀଙ୍କ ନିକଟରେ ନିଜର ମନୋକାମନା ପୂରଣ ପାଇଁ କୁକୁଡ଼ା, ପାରା ଓ ବକରା ଭଳି ଗୃହପାଳିତ ପଶୁପକ୍ଷୀଙ୍କୁ ବଲି ଦେଉଛନ୍ତି। ଏହା ସହ ଢୋଳ, ନିଶାନ ଓ ପାରମ୍ପରିକ ବାଦ୍ୟଯନ୍ତ୍ରର ଧ୍ୱନିରେ ଅଞ୍ଚଳ ମୁଖରିତ ହୋଇଉଠିଛି। ଗ୍ରାମୀଣ ଅଞ୍ଚଳରେ ଏହି ଯାତ୍ରାକୁ ନେଇ ବିଶେଷ ରୀତିନୀତି ପାଳନ କରାଯାଉଥିବା ବେଳେ ଲୋକମାନେ ନୂତନ ବସ୍ତ୍ର ପିନ୍ଧି ଭକ୍ତିଭାବରେ ପୂଜାରେ ସାମିଲ ହେଉଛନ୍ତି। ଆସନ୍ତା ମଙ୍ଗଳବାର, ୩୧ ତାରିଖରେ ଏହି ପର୍ବର ମୁଖ୍ୟ ଅନୁଷ୍ଠାନ ସମ୍ପନ୍ନ ହେବ। ଏହି ଅବସରରେ ଅଧିକାଂଶ ଗ୍ରାମବାସୀ ପାରମ୍ପରିକ ରୀତିଅନୁସାରେ “ଆମ୍ବ ନୂଆଁ” ଖାଇ ଉତ୍ସବକୁ ଅଧିକ ଉତ୍ସାହର ସହ ପାଳନ କରିବେ। ସମଗ୍ର ଅଞ୍ଚଳରେ ଭକ୍ତି, ପାରମ୍ପରିକତା ଓ ଆନନ୍ଦର ଏକ ଅନନ୍ୟ ମିଶ୍ରଣ ଦେଖିବାକୁ ମିଳୁଥିବା ବେଳେ ଘଟଯାତ୍ରା ଗ୍ରାମୀଣ ସଂସ୍କୃତିର ଜୀବନ୍ତ ଚିତ୍ର ପ୍ରଦର୍ଶନ କରୁଛି।

କଳାହାଣ୍ଡି ଜିଲ୍ଲା ଅତିରିକ୍ତ ପ୍ରତିନିଧି ମିଥୁଳା ନାଏକ ଙ୍କ ରିପୋର୍ଟ ଫାଟ୍ ନ୍ୟୁଜ ଓଡିଶା