ବାରିପଦା କଲେଜରେ ବିଜ୍ଞାନ ପ୍ରଦର୍ଶନୀ, ନିଜ ପ୍ରତିଭା ଓ ନବସୃଜନର ଝଲକ ଦେଖାଇଲେ ୨୮ଟି କଲେଜର ଛାତ୍ରଛାତ୍ରୀ

ବାରିପଦା: ବିଜ୍ଞାନ ହେଉଛି ଜ୍ଞାନ, ଗବେଷଣା ଓ ନବସୃଜନର ଏକ ଅସୀମ ଦୁନିଆ। ଏହି ଦୁନିଆରେ ନୂଆ ନୂଆ ପରିକଳ୍ପନା ଓ ଉଦ୍ଭାବନ ମାଧ୍ୟମରେ ନିଜର ପ୍ରତିଭା ପ୍ରଦର୍ଶନ କରିଛନ୍ତି ଛାତ୍ରଛାତ୍ରୀ। ମୟୂରଭଞ୍ଜ ଜିଲ୍ଲାର ବାରିପଦାସ୍ଥିତ ବାରିପଦା କଲେଜ ପରିସରରେ ଆୟୋଜିତ ଏକ ବିଜ୍ଞାନ ପ୍ରଦର୍ଶନୀରେ ଚାରିଟି ଜିଲ୍ଲାର ୨୮ଟି କଲେଜର ଛାତ୍ରଛାତ୍ରୀ ଯୋଗଦେଇ ନିଜ ନିଜର ବୈଜ୍ଞାନିକ ଚିନ୍ତାଧାରା, ଗବେଷଣା ଓ ସୃଜନଶୀଳତାର ପରିଚୟ ଦେଇଥିଲେ।ଏହି ପ୍ରଦର୍ଶନୀରେ ମୟୂରଭଞ୍ଜ, କେନ୍ଦୁଝର, ବାଲେଶ୍ୱର ଓ ଭଦ୍ରକ ଜିଲ୍ଲାର ବିଭିନ୍ନ କଲେଜରୁ ଆସିଥିବା ଛାତ୍ରଛାତ୍ରୀ ନିଜ ନିଜର ପ୍ରସ୍ତୁତ ବିଜ୍ଞାନଭିତ୍ତିକ ମଡେଲ ଓ ଅଭିନବ ପରିକଳ୍ପନା ପ୍ରଦର୍ଶିତ କରିଥିଲେ। ବିଜ୍ଞାନର ବିଭିନ୍ନ ଦିଗକୁ ଆଧାର କରି ପ୍ରସ୍ତୁତ ଏହି ମଡେଲଗୁଡ଼ିକ ଦର୍ଶକଙ୍କ ମନ ଆକର୍ଷଣ କରିଥିବା ବେଳେ ଛାତ୍ରଛାତ୍ରୀଙ୍କ ନୂତନ ଚିନ୍ତାଧାରା ଓ ଉଦ୍ଭାବନ ଉପସ୍ଥିତ ଅତିଥିମାନଙ୍କ ଦୃଷ୍ଟି ଆକର୍ଷଣ କରିଥିଲା।କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ (ଏମ୍.ଏସ୍.ସି.ବି.) ବିଶ୍ୱବିଦ୍ୟାଳୟର ଉପ କୁଳପତି ମହେନ୍ଦ୍ର କୁମାର ମହାନ୍ତି ଯୋଗଦେଇଥିବା ବେଳେ ମୁଖ୍ୟ ବକ୍ତା ଭାବେ ବୈଜ୍ଞାନିକ ନୀଳାଦ୍ରି ରାୟ ଉପସ୍ଥିତ ଥିଲେ। ସେହିପରି ସମ୍ମାନିତ ଅତିଥି ଭାବେ ମୃଣ୍ମୟ କୁମାର ଗିରି, ବାରିପଦା ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ରାଜେଶ କୁମାର ଷଡ଼ଙ୍ଗୀ ଏବଂ ବାରିପଦା ଡିଗ୍ରୀ ମହାବିଦ୍ୟାଳୟର ପ୍ରାଧ୍ୟାପକ ଡ. ପ୍ରବୋଧ କୁମାର ଦେଓ ଯୋଗଦେଇଥିଲେ।ଅତିଥିମାନେ ପ୍ରଦର୍ଶନୀରେ ଛାତ୍ରଛାତ୍ରୀଙ୍କ ଦ୍ୱାରା ପ୍ରସ୍ତୁତ ବିଭିନ୍ନ ବିଜ୍ଞାନ ମଡେଲ ଓ ନୂତନ ପରିକଳ୍ପନାଗୁଡ଼ିକୁ ଦେଖିବା ସହ ସେମାନଙ୍କ ସହ ଆଲୋଚନା କରିଥିଲେ। ବିଜ୍ଞାନ କେବଳ ପାଠ୍ୟପୁସ୍ତକ ମଧ୍ୟରେ ସୀମିତ ନରହି ଏହାକୁ ବ୍ୟବହାରିକ ଜୀବନରେ ପ୍ରୟୋଗ କରିବା, ଗବେଷଣାମନସ୍କ ହେବା ଏବଂ ନୂତନ ଉଦ୍ଭାବନ ପ୍ରତି ଆଗ୍ରହ ବଢ଼ାଇବା ଦିଗରେ ଏଭଳି ପ୍ରଦର୍ଶନୀର ଗୁରୁତ୍ୱ ରହିଛି ବୋଲି ମତ ପ୍ରକାଶ ପାଇଥିଲା।ଏଭଳି କାର୍ଯ୍ୟକ୍ରମ ଯୁବପିଢ଼ିଙ୍କ ମଧ୍ୟରେ ବୈଜ୍ଞାନିକ ମନୋଭାବ, ଗବେଷଣା ଓ ସୃଜନଶୀଳତାକୁ ପ୍ରୋତ୍ସାହିତ କରିବା ସହ ଭବିଷ୍ୟତରେ ନୂତନ ବୈଜ୍ଞାନିକ ଓ ଉଦ୍ଭାବକ ସୃଷ୍ଟି କରିବାରେ ସହାୟକ ହେବ। ଚାରିଟି ଜିଲ୍ଲାର ୨୮ଟି କଲେଜର ଛାତ୍ରଛାତ୍ରୀଙ୍କ ଏହି ମିଳନ ଓ ବିଜ୍ଞାନଭିତ୍ତିକ ପ୍ରତିଭା ପ୍ରଦର୍ଶନ ବାରିପଦା କଲେଜ ପରିସରକୁ ଏକ ବିଜ୍ଞାନ ଓ ନବସୃଜନର ମଞ୍ଚରେ ପରିଣତ କରିଥିଲା।