ପୂଜା ପାର୍ବଣରେ ‘ତୃତୀୟ ନୟନ’ ଦୃଷ୍ଟିହୀନ: ବାରିପଦାରେ ଅଚଳ ୬୪ ହାଇଟେକ୍ କ୍ୟାମେରା, ପ୍ରଶାସନର ଉଦାସୀନତାକୁ ଢାଲ କରି ରାଜୁତି କରୁଛନ୍ତି ଅପରାଧୀ

ବାରିପଦା, ୧୩/୯ (): ଆଜି ପବିତ୍ର ଗଣେଶ ପୂଜା ସହ ଆଗକୁ ଦୁର୍ଗାପୂଜା ଭଳି ବଡ଼ ଉତ୍ସବ ଆସୁଥିବାରୁ ସମଗ୍ର ସହରରେ ଲୋକଙ୍କ ଭିଡ଼ ଓ ଉତ୍ସାହ ବଢ଼ିବାରେ ଲାଗିଛି, ମାତ୍ର ଠିକ୍ ଏହି ସମୟରେ ମୟୂରଭଞ୍ଜ ଜିଲ୍ଲାର ସଦର ମହକୁମା ବାରିପଦା ସହରର ସୁରକ୍ଷା ବ୍ୟବସ୍ଥା ସମ୍ପୂର୍ଣ୍ଣ ରୂପେ ଭୁଶୁଡ଼ି ପଡ଼ି ପ୍ରଶାସନିକ ଦାୟିତ୍ୱହୀନତାର ଚରମ ନମୁନା ସାମ୍ନାକୁ ଆଣିଛି। ସହରରେ ଆଇନଶୃଙ୍ଖଳା ରକ୍ଷା, ଟ୍ରାଫିକ୍ ନିୟନ୍ତ୍ରଣ ତଥା ଅପରାଧୀଙ୍କ ଉପରେ କଡ଼ା ନଜର ରଖିବା ପାଇଁ ରାଜକୋଷରୁ ଲକ୍ଷ ଲକ୍ଷ ଟଙ୍କା ପାଣି ଭଳି ଖର୍ଚ୍ଚ କରି ଖଞ୍ଜାଯାଇଥିବା ୬୪ଟି ହାଇଟେକ୍ ବୁଲେଟ୍ ସିସିଟିଭି କ୍ୟାମେରା ଏବେ ସମ୍ପୂର୍ଣ୍ଣ ଅଚଳ ହୋଇ ବିଦ୍ୟୁତ୍ ଖୁଣ୍ଟରେ କେବଳ ନିର୍ଜୀବ ଶୋ’ପିସ୍ ପାଲଟି ଝୁଲୁଛି। ଲୋକଙ୍କୁ ସୁରକ୍ଷା ଯୋଗାଇବା ନାମରେ ବଡ଼ ବଡ଼ ପ୍ରଚାର କରି ଯେଉଁ ବ୍ୟବସ୍ଥାକୁ ଜିଲ୍ଲା ପୁଲିସ ପ୍ରଶାସନ ‘ଆଇ ଇନ୍ ଦି ସ୍କାଏ’ ବୋଲି ଡିଣ୍ଡିମ ପିଟୁଥିଲା, ତାହା ରକ୍ଷଣାବେକ୍ଷଣ ଓ ଉପଯୁକ୍ତ ତଦାରଖ ଅଭାବରୁ ଆଜି ମୁଦ୍ରିତ ନୟନରେ ପରିଣତ ହୋଇଛି। ଷ୍ଟିଲ ଗୋଲେଇ, ସତ୍ୟସାଇ ଛକ, ବାଲେଶ୍ୱର ଗୋଲେଇ, ପାଲବଣୀ, ଫାୟାର ଷ୍ଟେସନ୍ ଛକ ସମେତ ସହରର ୧୩ଟି ଅତି ସମ୍ବେଦନଶୀଳ ସ୍ଥାନରେ ଲାଗିଥିବା ଏହି ଅତ୍ୟାଧୁନିକ କ୍ୟାମେରାଗୁଡ଼ିକ କାମ ନକରିବା ପ୍ରଶାସନର କୁମ୍ଭକର୍ଣ୍ଣ ନିଦ୍ରା ଓ ଚରମ ଅପାରଗତାକୁ ହିଁ ପଦାରେ ପକାଇଛି। ପାର୍ବଣ ଋତୁରେ ଯେତେବେଳେ ବଜାରରେ ଲୋକଙ୍କ ଗହଳି ବଢ଼ୁଛି ଏବଂ ସୁରକ୍ଷା ବ୍ୟବସ୍ଥାକୁ ସବୁଠାରୁ ଅଧିକ କଡ଼ାକଡ଼ି କରାଯିବା କଥା, ସେତେବେଳେ ପୁଲିସର ଏହି ନିଷ୍କ୍ରିୟତାର ଭରପୂର ଫାଇଦା ଉଠାଇ ଲୁଟେରା ଓ ଅସାମାଜିକ ଗୋଷ୍ଠୀ ନିର୍ଭୟରେ ଖୁଲମଖୁଲା ଉପଦ୍ରବ ଚଳାଇଛନ୍ତି। ଦିନ ଦ୍ୱିପ୍ରହରରେ ବ୍ୟସ୍ତବହୁଳ ରାସ୍ତାରୁ ଛିନ୍‌ତାଇ, ଦୋକାନ ବଜାରରୁ ଚୋରି ଏବଂ ଆବାସିକ ଅଞ୍ଚଳରେ ଘରଫୋଡ଼ି ଭଳି ସଙ୍ଗୀନ ଅପରାଧ ଦିନକୁ ଦିନ ଅଣଆୟତ୍ତ ହେବାରେ ଲାଗିଛି। କୌଣସି ଅପରାଧ ଘଟିବା ପରେ ପୁଲିସ ଯେତେବେଳେ ତଦନ୍ତ ପାଇଁ ଘଟଣାସ୍ଥଳକୁ ଯାଉଛି, ସେତେବେଳେ ସିସିଟିଭି ଫୁଟେଜ୍ ନମିଳିବାରୁ ପୁଲିସର ହାତ ସମ୍ପୂର୍ଣ୍ଣ ଖାଲି ରହୁଛି ଏବଂ ସଠିକ୍ ପ୍ରମାଣ ଅଭାବରୁ ଦୁର୍ବୃତ୍ତମାନେ ଖସିଯାଇ ପୁଣି ନୂଆ ଅପରାଧ ଘଟାଇବାକୁ ସାହସ ପାଉଛନ୍ତି। ଜନସାଧାରଣଙ୍କ ସୁରକ୍ଷା ପାଇଁ ଉଦ୍ଦିଷ୍ଟ କୋଟି କୋଟି ଟଙ୍କାର ପ୍ରକଳ୍ପକୁ ଏଭଳି ଅବହେଳା କରି ଅଚଳ କରିଦେବା ଏବଂ ପର୍ବପର୍ବାଣି ସମୟରେ ମଧ୍ୟ ଏହାକୁ ସଜାଡ଼ିବାକୁ ତତ୍ପରତା ପ୍ରକାଶ ନକରିବା ପୁଲିସ ପ୍ରଶାସନର ଦାୟିତ୍ୱହୀନତାର ସୀମା ପାର୍ କରିଛି। ଯଦି ପ୍ରଶାସନ ତୁରନ୍ତ ଏହି ନିଦ୍ରାରୁ ନଚେତି ସମସ୍ତ ଅଚଳ କ୍ୟାମେରା ଓ କଣ୍ଟ୍ରୋଲ୍ ରୁମ୍ ବ୍ୟବସ୍ଥାକୁ କାର୍ଯ୍ୟକ୍ଷମ ନକରେ, ତେବେ ଆଗାମୀ ପୂଜା ବଜାରରେ ଅପରାଧୀଙ୍କ ଉତ୍ପାତ ଆହୁରି ଭୟାନକ ରୂପ ନେବ ଏବଂ ଏଥିପାଇଁ ସିଧାସଳଖ ଜିଲ୍ଲା ପୁଲିସ ତଥା ନଗର ପ୍ରଶାସନ ହିଁ ଦାୟୀ ରହିବେ ବୋଲି ସହରବାସୀଙ୍କ ମଧ୍ୟରେ ତୀବ୍ର ଆକ୍ରୋଶ ପ୍ରକାଶ ପାଇଛି।